D'eisigh grúdlann Guinness sraith lipéad i nGaeilge sa bhliain 1959 a bhí ina heiseamláir againn le haghaidh Dhubhchló GC. Ba é William Curran a dhear na lipéid agus tá an cló seo dílis don litreoireacht shainiúil a cheap sé, cé gurbh éigean dúinn roinnt litreacha nár léiríodh ar na lipéid a dhearadh as an nua. Cé go bhfuil an cló trom go leor, is de bharr an bhaint atá aige leis an leann dubh a baisteadh 'Dubhchló' air.

Is cló ornáideach é Dubhchló GC. Tá sé simplí agus soléite go leor lena úsáid le haghaidh na gceannteideal i dtéacs fada ach tá sé róthrom le húsáid i dtomhais bheaga.

Eisíodh an chéad leagan de Dhubhchló GC in 2023. Leasaíodh cruth na litreacha 'f', 'p', 'r' inseach agus 's' inseach sa dara leagan den chló a eisíodh in 2025.

An ḟoireann

Tá Dubhchló GC códaithe de réir Unicode, an caighdeán idirnáisiúnta, agus tá na carachtair go léir ann léirithe anseo. Is féidir sampla de théacs a clóbhuaileadh leis an gcló seo a léamh má tá Acrobat Reader ar do ríomhaire agat.

Malairtí stíle

Tá na leaganacha inseacha de 'r' agus de 's' le fáil mar mhalairtí stíle (stylistic alternates) sa chló; lena n‑úsáid, roghnaigh stylistic set 1.

Leasaíodh cruth na litreacha 'f', 'p', 'r' inseach agus 's' inseach sa dara leagan den chló, ach tá na seanlitreacha fós le fáil i dtacair stíle 2 agus 3, mar a léirítear sa tábla thíos:

Íoslódáil

	Más mian leat an cló seo a úsáid ar do ríomhaire pearsanta, faigh an comhad dubhgc.zip ina bhfuil leagan 1.00 de Dhubhchló GC mar chló OpenType.
	Más mian leat an cló seo a úsáid ar leathanach gréasáin, faigh an comhad dubhw.zip ina bhfuil leagan 1.000 de Dhubhchló GC sa Web Open Font Format.